PROGRAMA CULTURAL

	Premio de Teatro Novas Internacionais
	“A dor da vinganza” é o título da obra que o catoirense David Ferreira levará a escena na vindeira Romaría Vikinga As persoas interesadas en participar na obra deberán inscribirse na Biblioteca Pública Municipal antes do 7 de maio. O xurado do Premio de Teatro Romaría Vikinga resolveu por unanimidade que a obra gañadora da próxima edición sexa “A dor da vinganza”, pertencente ó pseudónimo “Cabalo de pedra”, polas súas cualidades dramáticas e polo seu acerto na presentación das accións teatrais desenvolvidas nun amplo precaderno de dirección. Aberta a correspondente plica, comprobouse que o autor da obra é David Ferreira Fabeira, veciño de Catoira de 24 anos de idade, que recibirá unha achega de 4.808 euros. O xurado, integrado por Roberto Salgueiro, director da Aula de Teatro da Universidade de Santiago de Compostela, Pablo Sampedro, director da Área de Cultura da Vicerreitoría de Cultura da USC, Ana Pérez Santos, concelleira integrante da Comisión de Cultura do Concello de Catoira, e Mª Elisa Castiñeiras Isorna, técnica do departamento de Cultura do Concello de Catoira, recomendaron deixar deserta a selección da obra que debería ser representada na edición de 2009 da Romaría Vikinga, tendo en conta que “as restantes obras presentadas nesta convocatoria non reúnen as características apropiadas para a súa representación”. Por este motivo, e coa finalidade de aumentar o prestixio deste Premio e acadar unha maior calidade dos textos presentados a vindeiras edicións do mesmo, recomendan modificar as bases 6 e 11 e destinar a totalidade da dotación do premio (4.808 euros) á redacción do texto, deixando a dirección e posta en escena da obra a outra persoa designada polo Concello de Catoira. Inscrición O Concello informa tamén que mañá, 22 de abril, se abre o prazo de inscrición para participar na representación teatral da XLVIII ROMARÍA VIKINGA, “A dor da vinganza”, de David Ferreira. Tódolos interesados poderán inscribirse na Biblioteca Pública Municipal ata o mércores 7 de maio. Fonte: Concello de Catoira (www.catoira.es)
	BANDOS: CAMPAMENTOS DE VERÁN DON ALBERTO GARCÍA GARCÍA, ALCALDE-PRESIDENTE DO CONCELLO DE CATOIRA (PONTEVEDRA) INFORMA: Que está aberto o prazo de inscrición nos campamentos de verán para persoas con discapacidade da Xunta de Galicia.. DESTINATARIOS: Persoas con discapacidade e con idades comprendidas entre os 9 e 40 anos. PREZO: Entre 72 e 160 euros (con desconto do 50% para familias numerosas) PRAZO DE INSCRICIÓN: Ata o 21 de maio de 2008. Para máis información poden dirixirse ós servizos sociais de atención primaria do Concello. ____________________________________________________________________________ DON ALBERTO GARCÍA GARCÍA, ALCALDE-PRESIDENTE DO CONCELLO DE CATOIRA (PONTEVEDRA) INFORMA: Que está aberto o prazo de inscrición nos campamentos de verán para nenos/as da Deputación Provincial de Pontevedra no centro de vacacións "A Lanzada". DESTINATARIOS: Nenas/os nados entre os anos 1995 e 2000. PREZO: 68 euros DATAS: Haberá 8 turnos de 7 días de duración cada un, durante os meses de xullo e agosto PRAZO DE INSCRICIÓN: Ata o 8 de maio de 2008. Para máis información poden dirixirse ós servizos sociais de atención primaria do Concello. Fonte: Concello de Catoira (www.catoira.es)

	ENTROIDO 2008: Bases do concurso de comparsas e desfile infantil 07.01.2008 O Concello de Catoira informa da convocatoria do concurso de comparsas do Entroido 2008. DON ALBERTO GARCÍA GARCÍA, ALCALDE-PRESIDENTE DO CONCELLO DE CATOIRA (Pontevedra) INFORMA: Que o Concello de Catoira convoca a tódolos/as veciños/as e a tódalas asociacións socioculturais do municipio a participar na actividade cultural do ENTROIDO 2008, e establece: CONCURSO COLECTIVO: - As comparsas deberán estar integradas por un mínimo de 15 persoas. - Un incentivo de 200 euros para cada asociación de Catoira que presente unha comparsa ó Entroido 2008. As asociacións que se presenten deberán estar legalmente constituídas e ter realizado actividades durante o ano 2007. - Tres premios á creatividade para comparsas: 1º Premio: 300 € 2º Premio: 200 € 3º Premio: 100 € - As asociacións e grupos interesados en participar deberán inscribirse na Biblioteca Pública Municipal (Tf. 986 54 68 01). O prazo remata o mércores 30 de xaneiro. As asociacións de Catoira deberán axuntar ó boletín de inscrición unha fotocopia do CIF. - As comparsas que se presenten ó concurso deberán escenificar a idea central do seu disfrace na Festa de Disfraces que terá lugar no Pavillón Polideportivo Municipal despois do desfile polas rúas do municipio o domingo 3 de febreiro. - Os premios ás mellores comparsas serán outorgados por votación do público asistente. DESFILE DE DISFRACES INFANTIL: Tódolos rapaces/zas que acudan disfrazados/as e participen no desfile que se celebrará no Pavillón Polideportivo Municipal recibirán un agarimo. Os/as interesados en participar deberán inscribirse na Biblioteca Pública Municipal (Tf. 986 54 68 01). O prazo remata o mércores 30 de xaneiro. O desfile de comparsas e disfraces sairá da Praza do Doutor Vázquez e percorrerá a Rúa da Estación para rematar no Pavillón Polideportivo Municipal. Tódolos/as participantes deberán concentrarse na Praza do Dr. Vázquez ás 17,30 horas do domingo 3 de febreiro de 2008. ANIMÁDEVOS E PARTICIPADE NO ENTROIDO DE CATOIRA 2008! Catoira, 7 de xaneiro de 2008 O ALCALDE-PRESIDENTE Descargar ficha de inscripción de comparsas (extaído da web do Concello www.catoira.es)